Peristiwa Perayaan Natal "Bersama"

SARAN PAR KAJADIANG DI NAGRI AMAHUSU 

 Kota Ambon, nampak dari bukit Airmatacina. 

Terlihat menara Masjid Raya Al-Fatah(kiri) dan Gereja Silo(kanan), 

serta laut Teluk Ambon dan jazirah barat pulau Ambon di seberang.

Walang-walang nie akang rame dar kamareng, dong stori asek kajadian di nagri Amahusu. Amahusu nie nagri Sarane, undang dong pung sudara Salam dar Laha deng Tial par merayakan Hari Kajadiang(Natal).

Parkara panggel-panggel par biking rame-rame, itu biasa. Yang tar biasa itu manganai basudara dar Laha deng Tial ada tambah mata acara perayaan Natal deng Azan. Azan itu akang pung guna hanya par panggel orang Salam datang ka Masigit atau ka laeng tampa cuma par sambayang(Shalat), juga upamanya dlm prosesi ritual lain yg ansih par orang Salam. Laeng seng. Artinya, kajadian di Amahusu itu ada yang tasalah mangarti, salah paham, salah penempatan, orang jawa gemba bilang bablas – kebablasan. Orang nagri bilang biking barang tar mister kutika deng oras, yg ta kiri2 bilang tar akal.

Basudara e, dolo-dolo tu waktu agama datang di Nagri-nagri di Maluku, mulae dar Salam, lalu Katolik, lalu Protestan, kecuali yang laeng kaya Hindu, Budha deng agama orang china beta tar dapa carita. Tete-nenemoyang su ator akang paleng bae. Mau iko Salam, kamong biking kampong sandiri di jazirah ka atau di pante mana terserah, mau iko Kresten sama lae biking kamong kampong sandiri.

Dong pung maksud itu supaya sandiri-sandiri bebas jalani ajaran kamong pung agama, seng saling mengganggu deng terganggu deng orang laeng yg seng sama satu agama. Azan, sambayang, deng mangaji di kamong pung Masigit saja, Ibadah - Manyanyi Kidung Rohani di kamong pung Gareja jua, jang baku ta tukar, jang baku maso sabarang, nanti baku ta sala. Mar bagitu ada akang pung syarat, janji mati seng-jang paskali putus hubungan sudara(gandong) sampe kiamat. Tetap baku lia, bantu saat ada parlu, saling hormat, saling jaga batas toleransi dlm kerangka saling baku-sayang. Baku pisah kampong iko agama tu bukang par baku pisah atau baku buang, tapi par samua pung bae deng tetap sampe dunia tabongkar mar tarus baku lia bae, jang salah paham.

Maka itu orang ta tua dolo dong hidop tar baku ta toki. Dong ba piara sudara, piara hidop makanya akang umur, tar baribot2 kaya skrang.

Sakarang dong ator iko dong pung pintar-pintar laeng lae, mangarti bodo-bodo, akhirnya timbul masalah yg buang waktu dan energi yg seng perlu. Tetapi kajadiang di Amahusu tu jang biking akang jadi karja par bacarita ilang waktu, sampe jadi hal baru. Ator akang deng bae-bae. Kalo ada yang salah, no kas batul akang, biking lurus akang kalo bengko, bale akang ka tampa yang batul. Lalu jang biking model kaset, laa tinggal putar ulang-ulang. Pake akal, jang sampe orang bilang tar akal.

Ini hanya “tasala makang”, cako aer puti laa gargantang bale lurus. Inga-inga, jang sampe suanggi2 ambe manfaat dar kajadiang ini, lalu biking Salam-Sarane baku buang muka.

Intinya, lokalisir masalah, minimalkan dampaknya, selesaikan secara santun dan beradab.

Masih banyak hal yang lebih perlu diperbincangkan dan diselesaikan untuk kepentingan kesejahteraan bersama sesama #OrangMaluku hari ini dan hari esok.

( #MOZAIKCoffee )

*****

Catatan ; Saran ini adalah seperti yang sudah disampaikan dan dimuat di akun group khusus Masyarakat Maluku pada salah satu Media Sosial dan mendapat tanggapan positif semua pihak di lingkup Masyarakat Maluku.  Adapun masalahnya sudah diselesaikan secara baik-baik dan tentu saja damai, melalui penyampaian permohonan maaf secara resmi oleh Panitia penyelenggara. Hal ini tentang tentang perayaan Natal pada tanggal 2 Desember 2018 di Negeri(Desa) Amahusu yang mengikutsertakan warga Muslim dari Negeri Tial dan Laha yang sempat mengumandangkan Azan, Tilawah Al-Qur'an serta Shalawat di gereja tempat penyelenggaraan perayaan Natal. Lepas dari "kekeliruan" yang terjadi, yang pasti dua negeri Muslim tersebut hadir karena juga untuk prosesi upacara adat "panas pela-gandong", yang secara budaya dan dalam sejarah Negeri Amahusu(Nasrani), Tial(Muslim), Laha(Muslim), dan Hatalai(Nasrani) memiliki ikatan satu keluarga sekandung - kakak beradik, berdasarkan sejarah garis keturunan asal-usul keempat Negeri dimaksud.

Adapun tulisan di atas disajikan menggunakan bahasa komunikasi Melayu Ambon atau Bahasa Ambon sehari-hari.